Michael Carrick, knattspyrnustjóri Manchester United, segist ekki velta framtíð sinni hjá félaginu fyrir sér þrátt fyrir erfiða byrjun liðsins á tímabilinu.
United hefur aðeins fengið fjögur stig úr fyrstu fjórum leikjum sínum í ensku úrvalsdeildinni og síðustu dagar hafa verið sérstaklega erfiðir. Liðið tapaði 1–0 gegn Manchester City á Old Trafford um síðustu helgi áður en Brighton sló United úr deildabikarnum á miðvikudagskvöld.
United komst í 2–0 gegn Brighton en gestirnir sneru leiknum við og unnu 3–2. Þetta var í fyrsta sinn í hálfa öld sem Manchester United tapaði heimaleik eftir að hafa náð tveggja marka forystu.
Úrslitin hafa aukið umræðuna um stöðu Carricks, en sjálfur segist hann lítið gefa fyrir vangaveltur um framtíð sína.
„Að vera að hugsa um framtíðina, eigendurna og hversu langan tíma ég hef er fáránlegt í þeirri stöðu sem ég er í. Þetta er einfaldlega ekki eitthvað sem ég er að hugsa um,“ sagði Carrick á blaðamannafundi fyrir leik United gegn Fulham.
Carrick viðurkennir að úrslitin að undanförnu hafi ekki verið nógu góð en segir stöðuna langt frá því að vera hörmung.
Hann bendir á að United hafi verið inni í leikjunum og á köflum verið sterkari aðilinn. Liðið hafi gert margt vel þótt það hverfi auðveldlega í skuggann þegar úrslitin séu slæm.
Carrick tók við Manchester United í janúar og vann 12 af 17 leikjum sínum á síðasta tímabili. United endaði í þriðja sæti en byrjunin á nýju tímabili hefur verið mun erfiðari.
Næsta verkefni United er útileikur gegn Fulham á Craven Cottage á sunnudag.
